Sjávarsafnið í Ólafsvík opnaði síðasta sunnudag 9. júní.  Í safninu er að finna töluvert af minjum frá  sjávarútvegi á svæðinu á síðustu öld. Þá voru settar upp í tilefni sumarsins tvær sérsýningar, í samstarfi við Náttúrustofu Vesturlands voru settar upp ljósmyndir sem sýna vel umfang síldardauðans í Kolgrafarfirði og hafa þær vakið verðskuldaða athygli hjá erlendum ferðamönnum.

Það eru fastir liðir eins og venjulega í sumarbyrjun að laga þarf til í bænum. Starfsmenn áhaldahúss voru mættir snemma í gær á Nesveginn með malbik og skólfur og áttu mjög annríkt við að fylla í holur á götunni. Sumarblómin eru einnig komin í blómakerin í Hólmgarði og sóparabíll sópar göturnar. Þá má þjóðhátíðardagurinn koma.

Gæðingamót var haldið á Kaldármelum fyrir skömmu og kom í ljós hvaða hestar fara á fjórðungsmótið síðar í sumar.  Úrslit Gæðingamótsins má nálgast á vef Snæfellings snaefellingur.123.is en hestur mótsins var Svanur frá Tungu, hryssa mótsins: Brá frá Brekkum, knapi mótsins: Lárus Hannesson og efnilegasti knapinn, Fanney O. Gunnarsdóttir  

Sigurbjartur Loftsson byggingafræðingur hefur ráðinn í starf skipulags- og byggingarfulltrúa Grundarfjarðar og Stykkishólms. Áætlað er að hann hefji störf í júlí. Ráðingarstofan Hagvangur hélt utan um ráðningarmálin en endanleg ákvörðun var í höndum bæjarstjórna í Grundarfirði og Stykkishólmi. Vel á 14 umsóknir bárust um það. Sigurbjartur hefur tengingu hér í Stykkishólm því hann er tengdasonur Sigurlínu Sigurbjörnsdóttur og Hermanns Guðmundssonar.

Framundan eru framkvæmdir í Súgandisey en þær munu hefjast á næstu dögum. Þar til framkvæmdum er lokið verður mikið rask og hífingar við eyjuna. Bílastæðunum við Súgandisey verður því lokað eftir þörfum á framkvæmdatímanum.

Framkvæmdaráð Vesturlands hefur lokið úthlutun til verkefna sem valin voru í Sóknaráætlun Vesturlands fyrir árið 2013. Val verkefna byggðist á greiningarvinnu Byggðastofnunar og Atvinnuráðgjafar Vesturlanda á stöðu Vesturlands, þar sem sóknartækifæri og styrkleikar, veikleikar, ógnanir og tækifæri svæðisins voru greind.

Kajakmaðurinn Guðni Páll Viktorsson sem þessa dagana rær á kajak í kringum landið kom við hér í Stykkishólmi um síðustu helgi.  Framtak Guðna er til styrktar Samhjálp og nefnist Kringum Ísland - Lífróður Samhjálpar. 

Snæfell/Geislinn vann mikilvægan sigur í B-riðli 4.deildar í gær þegar liðið sigraði Kormák/Hvöt 2-1, en þessi lið voru í harðri baráttu í neðri hluta riðilsins.  Með sigrinum náði Snæfell/Geisli að slíta sér aðeins frá botninum og í hóp liða sem eru með 4 stig í riðlinum í 3.-6.sæti. 

Ráðherraráð Evrópusambandsins og Evrópuþingið hafa náð samkomulagi um breytta og bætta sjávarútvegsstefnu ESB og til að kynna helstu efnisatriði hennar efnir Evrópustofa til opinna funda með Ole Poulsen, sérfræðingi í sjávarútvegsmálum ESB, í Stykkishólmi, Vestmannaeyjum og Reykjavík dagana 12. – 14. júní 2013. Fundurinn í Reykjavík er haldinn í samstarfi við Alþjóðamálastofnun Háskóla Íslands.

Í Stykkishólmskirkju sunnudagskvöldið 16. júní halda tónleika þau Sigga Beinteins, Guðrún Gunnars og Jógvan Hansen en þau eru að leggja upp í tónleikaferð um landið sem nefnist „Við eigum samleið“ Þau flytja gömlu góðu lögin sem allir þekkja og segja sögur milli laga eins og þeim einum er lagið. 12. júlí kemur svo Áhöfnin á Húna í Stykkishólmshöfn og verður með tónleika í beinni útsendingu á RÚV.