Dagur leikskólans er í dag en Félag leikskólakennara var stofnað 6.febrúar 1950 og fagnar því sextíu ára afmæli í dag.  Félagið var stofnað af 22 leikskólakennurum sem þá höfðu útskrifast sem slíkir hér á landi, en þeir fyrstu útskrifuðust frá Uppeldisskóla Sumargjafar í febrúar 1948. Leikskólakennarar hér í Stykkishólmi tóku forskot á sæluna og héldu upp á daginn í gær með foreldrakaffi í leikskólanum. 

Félag leikskólakennara er annað stærsta aðildarfélag Kennarasambands Íslands og félagar þess í dag eru um 2400.

Í tilefni að þessum tímamótum ákvað stjórn félagsins að láta gefa út bók sem sem er einskonar samtímaheimild þar sem helstu vörður á leið stéttarinnar eru skoðaðar út frá sjónarhóli þeirra sem staðið hafa í eldlínunni.

Bókaútgáfan Skrudda gefur bókina út og sér um sölu hennar.  Á heimasíðu Skruddu er bókinni lýst með eftirfarandi hætti: Í sextíu ár hafa leikskólakennarar átt ríkan þátt í uppeldi þjóðarinnar. Stéttin getur rakið rætur sínar til örfárra hugsjónakvenna, sem tóku höndum saman um að stofna félag utan um kjarabaráttu fyrstu útskriftarárganga Uppeldisskóla Sumargjafar. Í tímanna rás hefur margt áunnist og breyst, en eitt helst stöðugt: Leikskólakennarar eru fólk sem starfar af hugsjón og metnaði – fólk sem sinnir störfum sem skipta sköpum fyrir samfélagið. Spor í sögu stéttar segir sögu leikskólakennara frá sjónarhóli ríflega þrjátíu máttarstólpa sem tekið hafa þátt í mótun stéttarinnar. Þetta er lifandi saga, þar sem stoltið skín úr hverri frásögn.

Afmælis félagsins og útgáfu bókarinnar var fagnað á sérstökum hátíðarfundi sem haldinn var í Þjóðmenningarhúsinu í gær föstudaginn 5. febrúar.  Á fundinum var Katrínu Jakobsdóttur mennta- og menningarmálaráðherra afhent fyrsta eintak bókarinnar.  

                                                                                                    Úr fréttatilkynningu