Eins og áður hefur verið greint frá þá átti Hólmarinn Ásta Hermannsdóttir 2.árs nemi í fornleifafræði, eitt fimm verkefna sem tilnefnd voru til Nýsköpunarverðlauna forseta Íslands sem afhent voru s.l. þriðjudag við hátíðalega athöfn á Bessastöðum. Markmið verðlaunanna er að heiðra námsmenn sem unnið hafa framúrskarandi starf við úrlausn verkefna sem styrkt eru af Nýsköpunarsjóði námsmanna.
       Sjálf  Nýsköpunarverðlaunin komu ekki í hlut Ástu í þetta skiptið en hún hlaut, ásamt hinum sem tilnefnd voru, viðurkenningu fyrir framúrskarandi úrvinnslu síns verkefnis.  Verkefni Ástu nefnist „Fornleifar í eyðidal: Skráning og kynning á fornum minjum í Seljadal“ og er tvíþætt.  Annarsvegar fornleifaskráning á Seljadal Þingeyjarsýslu og síðan nýting skráningargagnanna auk annarra heimilda til að þróa hugmyndir um mögulega nýtingu fornleifanna í tengslum við ferðaþjónustu á svæðinu. 
       Ásta þróaði hugmyndir hvað varðar tengingu fornleifanna við ferðaþjónustu og ferðaþjónustuaðila, sem og áhugaaðila um fornleifar o.s.frv.  Fornleifar eru að mestu vannýtt auðlind í ferðaþjónustu á Íslandi og gæti nýting þeirra aukið fjölbreytni og atvinnusköpun í menningar-og náttúrutengdri ferðaþjónustu.  Yfirleitt eru það eingöngu fornleifauppgreftir sem fólki er boðið að skoða og því er þarna um nýbreytni að ræða.
       Niðurstaða verkefnisins var sú að með fornleifaskráningu sé kominn góður grunnur fyrir nýsköpun í ferðaþjónustu á því svæði sem skráningin fór fram.  Í Seljadal sem Ásta vann með, eru mjög sjónrænar og ósnertar minjar út um allt og þar því góð tækifæri á þessu sviði.  Hugmyndir allt fá bæklingum og skiltum upp í göngukort og fjölskylduferðir voru skoðaðar og eru flestir þeir kostir sem skoðaðir voru í sambandi við ferðaþjónustu raunhæfir þar.  Verkefni sem þetta væri hægt að gera allsstaðar á landinu, með því að kaupa fornleifaskráningu geta sveitarfélög, og aðrir innan þeirra, komið sér upp grunni fyrir nýtingu þeirrar auðlindar sem fornleifar eru. Þar yrði þó alltaf að hafa fagaðila með í ráðum til að sjá til þess að fornleifum og náttúrunni sé ekki stofnað í hættu með auknu aðgengi ferðamanna enda varðar það við lög að eyðileggja fornleifar.  En ef fornleifar eru nýttar á þennan hátt í ferðaþjónustu geta fleiri en bara ferðamenn notið þeirra, enda eru þær aðgengilegar öllum. Heimamenn hafa án efa flestir áhuga á því að kynna sér það sem í nágrenninu er og  njóta náttúrunnar í leiðinni. 

                                                                                              Birtist í Stykkishólms-Póstinum í dag 4.mars