Skólastjórafélag Íslands (SÍ) hefur sent Katrínu Jakobsdóttur menntamálaráðherra áskorun „um að ráðuneyti menntamála fylgist náið með rekstri grunnskóla og tryggi grunnskólanemendum í sveitarfélögum í fjárhagskröggum jafnrétti til náms með inngripi ef þarf. 

Stjórn Skólastjórafélags Íslands lýsir yfir verulegum áhyggjum af því ástandi sem er að skapast í nokkrum grunnskólum vegna endurtekins niðurskurðar í rekstri skólanna. Þetta á við um sveitarfélög sem glíma við mikla fjárhagsörðugleika.

Stjórn félagsins bendir á eftirlitshlutverk ráðuneytisins og ábyrgð þess á að börnum og ungmennum sé tryggt jafnrétti til náms, óháð búsetu í sveitarfélagi. Jafnræði í aðgengi að góðri grunnmenntun er einn af hornsteinum íslensks samfélags og því ber ríkisvaldinu að fylgjast með og grípa inn í ef einstök sveitarfélög megna ekki að veita þá þjónustu sem íbúarnir eiga rétt á.“

                                                                                                             Fréttatilkynning