Það er athyglisvert að rýna í tölur sem berast nú úr öllum áttum varðandi hegðun ferðamanna. Þegar litið er á tölur um gestafjölda og gistinætur á tjaldsvæðinu hér í Stykkishólmi sést að á milli ára 2011 og 2012 er breyting. Í júní í ár voru tölurnar hærri en í fyrra en í júlí í ár voru þær lægri. Á bak við þessar tölur er annarsvegar fjöldi gesta sem koma á tjaldsvæðið en hinsvegar gistinætur sem tilgreinir hve margar nætur er gist, þ.e. í raun fjöldi gesta margfaldað með fjölda nátta.

Í nýlegum tölum vegagerðarinnar um umferð í júlí kemur fram að umferð hafi aukist í höfuðborginni í júlí s.l. en aukningin hafi ekki skilað sér út á hringveginn. Skv. tölum vegagerðarinnar hefur ekki mælst minni umferð síðan árið 2006. Munur á milli ára er 2,4%.

Ef skoðaðar eru tölur fyrir Vesturland í júlí nú í ár og árið 2011 er samdrátturinn 9.9% en frá áramótum er samdrátturinn 4.2% Mesti samdrátturinn á umferð er um Norðurland 10% en mesta aukningin er um Suðurland 5.7% á milli áranna 2011 og 2012.  Þarna er ekki ólíklegt að rof hringvegsins í fyrra við Múlakvísl hafi áhrif á tölur.

Fjölgun gistinátta á hótelum fjölgar á milli ára í júní skv. tölum Hagstofunnar um 13%. Af hótelgestum eru 86% þeirra erlendir gestir. Fjölgun gistinátta á höfuðborgarsvæðinu á milli ára í júní er 15% en á sameiginlegu svæði Vesturlands og Vestfjarða var fjölgunin 12% líkt og á Suðurlandi. Mesta aukningin var hinsvegar á Austurlandi þar sem hún var 19% á milli ára í júnímánuði.  Tölurnar um gistinætur á hótelum miðast við hótel sem opið hafa

allt árið.