Snæfell vann Val í gærkvöldi 69-58 í mikilvægum leik í botnbaráttu Iceland Express deildar kvenna.  Aðeins tvö stig skildu liðin að fyrir leikinn, Valur var á botninum með 4 stig og Snæfell þar fyrir ofan með 6.  Með sigrinum náði Snæfell því að slíta sig frá botninum en það er eitt lið sem fellur.  Á laugardaginn leikur Snæfell svo síðasta heimaleik sinn í deildarkeppninni á tímabilinu þegar liðið mætir Njarðvík.  Nái Snæfell sigri þar er sætið í deildinni tryggt og jafnframt kominn möguleiki fyrir liðið að komast inn í 8 liða úrslitin. 
   Snæfell hafði leikinn í gær í hendi sér allan tímann, byrjaði mun betur en Valur og komst í 10-0 áður en að Valur komst fyrst á blað þegar 4 mín voru liðnar af leiknum.  Snæfell leiddi allan leikinn og var með tiltölulega örugga forystu allan leikinn.  Snæfell náði 17 stiga forskoti 27-10 þegar 2.leikhlutinn var hálfnaður og leiddi með 15 stigum 33-18 þegar farið var inn í hálfleikinn.  Sá munur hélst og gott betur í 3.leikhlutanum en þá fór munurinn í tuttugustigin 44-24 og svo 46-26, þegar leikhlutanum lauk var Snæfell með örugga forystu 53-34 og ljóst að það mátti mikið ganga á í 4.leikhlutanum og óvæntir hlutir að gerast ef Snæfellsliðið átti að tapa niður þessum mun.  Þó Valsstúlkur hafi ekki gefist upp og gerðu heiðarlega tilraun til að jafna leikinn þá náðu þær muninum ekki lengra niður en í 11 stig 55-44 en þá var að vísu nægur tími eftir þ.e.um 6 og hálf mínúta.  En þá þyrfti Snæfellsliðið líka að leika mjög illa en þær kláruðu þetta örugglega og hleyptu Valsstúlkunum aldrei nær en tíu stiginn 50-60 þegar um 3:30 voru eftir og bara formsatriði að keyra úrslitin í hús.  Lokatölur urðu eins og áður sagði 69-58 og Snæfell hefur þar með unnið alla þrjá leikina gegn Val og hefur því betur í innbyrðis viðureignum.  
     Þrátt fyrir að þjálfarar beggja liða hefðu skipt töluvert inná  þá voru það einungis 5 leikmenn hjá hvoru liði sem skoruðu fyrir sín lið.  Hjá Snæfelli var Gunnhildur mjög góð og flott að fá hana svona sterka inn á lokakaflanum. Gunnhildur var með 17 stig, 9 fráköst 4 stoðsendingar og 6 stolna bolta.    Sherrel Hobbs var þó stigahæst með 21 stig en hún á að geta enn betur en hún gerði í gær.  Þá áttu Hrafnhildur, Sara og Unnur líka góðan leik og frábært að fá byrjunarliðið í gírinn þegar mest á reynir á lokakaflanum.   Sara Sædal er að vakna aftur til lífsins og átti góðan leik í gær,  toppaði aðra leikmenn liðsins í skotnýtingu en skaut því miður aðeins þrisvar og skoraði 5 stig og gaf 7 stoðsendingar. Hrafnhildur var með 9 stig, 6 fráköstu og 3 stoðsendingar og Unnur með 5 stig og 9 fráköst.  Hjá Val var Hrund Jóhannesdóttir allt í öllu undir körfunni, nýtti færi sín vel þar og tók auk þess 11 fráköst.  Dranadia Roc átti rispur en var líkt og Valsliðið með arfaslaka nýtingu fyrir utan 3ja stiga línuna.  Roc reyndi 10 þriggja stiga skot án þess að hitta og allt Valsliðið var með 19 tilraunir.  Það gerir 3ja stiga skotanýtingu Snæfells frábæra en hún var 38% þ.e. þær hittu úr 9 af 24 skotum.  
      Eins og staðan er nú þegar 3.umferðir eru eftir af deildarkeppninni þá er Valur í neðsta sætinu með 4 stig, Snæfell þar fyrir ofan með 8 stig og svo kemur Njarðvík með 12 stig.  Snæfell á því veikan möguleika á að komast í úrslitakeppnina en til þess að það gerist þarf liðið að sigra síðustu þrjá leiki sína.  Þá stæði liðið með 14 stig og betra hlutfall úr innbyrðisviðureignum gegn Njarðvík, þannig að þó Njarðvík vinni Val líka þá dugar það ekki til.

Leikirnir sem eru eftir hjá Snæfelli:
12.feb.  laugard.       Stykkishólmur       kl.15:00   Snæfell - Njarðvík
24.feb. miðv.d.      Ásvellir Hafnarf.        kl.19:15   Haukar - Snæfell
3.mars  miðv.d.  Vodafonehöllin R.vík  kl.19:15    Valur - Snæfell