Í septembermánuði samþykkti bæjarstjórn Grundarfjarðar samhljóða að óska eftir viðræðum við önnur sveitarfélög á Snæfellsnesi um sameiningu sveitarfélaganna.  Á sameiginlegum fundi sveitarstjórnarmanna af svæðinu þann 29. okt fengu bæjarfulltrúar í Grundarfirði áskorun um að skýra sjónarmið sín fyrir íbúumSnæfellsness og er þessi pistill liður í því.

Þegar kosið var um sameiningu sveitarfélagannaá árinu 2005, lá í loftinu að fljótlega yrði aftur rætt um sameiningarmál áSnæfellsnes, enda framtíðarsýn flestra að sjá hér sameinað sveitarfélag, sem gæti veitt góða þjónustu og verið öflugur málsvari svæðisins.  Það sem ýtir við málinu á ný, er gerbreytt staða sveitarfélaganna eftir hrun bankakerfisins á síðasta ári og þeirra efnahagsþrenginga sem allir þurfa að takast á við.

Það blasir við að sveitarfélögin þurfa að heyja mikla varnarbaráttu til að geta haldið úti  grunnþjónustu og berjast fyrir hagsmunum svæðisins út á við, þar sem að niðurskurður blasir hvarvetna við.  Sameinuð, talandi einni röddu, stendur fjögur þúsund manna samfélagið sterkar að vígi í þeirri baráttu en í núverandi einingum.   Sveitarfélögin á Snæfellsnesieiga með sér gott samstarf um rekstur Félags- og skólaþjónustu Snæfellinga,  um rekstur byggðasafns Snæfellinga(Norska húsið) og um uppbyggingu Fjölbrautaskóla Snæfellinga  auk fleiri mála.  Sá grunnur sem hefur verið lagður mun auðvelda til muna sameiningu sveitarfélaganna, þegar af verður.   

Á vettvangi sveitarstjórnarstigsins hefur verið mikið rætt um að búa til öflugri stjórnsýslueiningar sem geti tekið við fleiri verkefnum frá ríkinu.  Þegar er ákveðið að málefni fatlaðra muni færast yfir til sveitarfélaganna 1. jan2011.  Það verður sífellt  sennilegra að takist ekki að sameina sveitarfélög í frjálsum sameiningum verði það gert með valdboði. 

Við þessar aðstæður er mikilvægt að heimamenn hafi stjórn á framgöngu mála, en lýsi ekki yfir uppgjöf.  Við erum tilbúinn til að takast á við framtíðina núna í stað þess að fresta henni og  erum óhrædd við að takast á við ný verkefni og tækifæri af framsýni, kjarki og metnaði.

                                                                            

                                                                                         Sigríður Finsen

                                                                                        Forseti bæjarstjórnar Grundarfjarðar