Snæfellspiltar hefja keppni í úrslitakeppni Íslandsmótsins í kvöld þegar þeir mæta Þór í Þorlákshöfn.  Í fyrstu umferð þarf bara að vinna tvo leiki til að komast áfram þannig að það þarf að byrja af krafti og helst að vinna fyrsta leik.  Snæfell endaði í 6.sætinu þannig að liðið á ekki möguleika á heimaleikjarétti í keppninni komi til oddaleiks en getur með því að vinna fyrsta leik náð til sín úrslitaleiknum í rimmunni. 

Snæfell tapaði fyrir Njarðvík 85-93 í kvöld í þriðja leik liðanna í undanúrslitum Íslandsmótsins.  Þar með er staðan orðin 1-2 fyrir Njarðvík í rimmu liðanna en þrjá sigra þarf til að komast áfram. Leikurinn í kvöld var líkt og fyrstu tveir jafn og spennandi.  Eftir jafnan fyrri hálfleik þar sem Snæfell var þó meira í að elta þá náði Snæfell yfirhöndinni í þriðja leikhluta og var leiðandi þar til komið var í fjórða leikhlutann. 

Snæfell leikur í kvöld kl.19:15 annan leikinn gegn Njarðvík í úrslitakeppni IE-deildar kvenna.  Njarðvík vann fyrsta leikinn naumlega á heimavelli og því afar mikilvægt að Snæfell vinni sigur hér heima í kvöld.  Það er ekki aðeins mikilvægt til að jafna metin heldur einnig til að brjóta ísinn og landa fyrsta sigrinum á Njarðvík í vetur.  Það myndi létta af því sálfræðilega taki sem Njarvík hefur haft á Snæfelli og setja alla pressuna yfir á Njarðvík.  Stuðningsfólk Snæfells ætti því að fjölmenna á pallana og hvetja Snæfellsstelpurnar til sigurs. ÁFRAM SNÆFELL !!

Snæfellspiltar mættu vel stemmdir í Röstina í kvöld tilbúnir í baráttuleik til að tryggja sér sæti úrslitunum en heimamenn voru meira með hugann við móttöku á deildarmeistarbikarnum að leik loknum.  Snæfell hóf því leikinn af krafti, náði strax frumkvæðinu og vann fyrsta leikhlutann með þrettán stiga mun 21-34.  Það var munur sem Grindavík náði aldrei að brúa enda bætti Snæfell í í 2.leikhluta og þá varð forustan tuttugu stig.  Þó Grindavík hafi náð smá spretti á lokamínútunum, þá var sigur Snæfells aldrei í hættu og lokatölur urðu 89-101.

Snæfell tryggði sig inn í úrslitakeppnina í IE-deild kvenna með 59-61 sigri á Keflavíki í spennuleik sem leikinn var á heimavelli Keflavíkur.  Keflavík var ávallt með frumkvæðið í upphafi hvers leikhluta og en Snæfell koma alltaf til baka og var sterkari aðilinn í lok leikhlutanna.  Þannig hélst það leikinn út og því stóð Snæfell uppi sem sigurvegarinn í lok leiksins. 

Ljósmynd: Þorsteinn Eyþórsson

Meistaraflokkur kvenna, stelpurnar þurfa að sigra í einum leik til viðbótar til að tryggja sér farmiða í undanúrslitin sem yrði besti árangur kvennaliðisns fyrr og síðar, sigri þær í báðum leikjunum enda þær í 3. sæti.  Allt þarf að ganga upp til þess að markmiðið náist, að komast í úrslitakeppnina.  Deildarkeppninni lýkur í þessari viku með útileik gegn Keflavík þriðjudaginn 13. mars klukkan 1915 og síðasti leikurinn í deildinni er á heimavelli laugardaginn 17. mars klukkan 1500.

Snæfell vann öruggan sigur 87-56 á Hamri í dag í IE-deild kvenna og heldur þar með 3.sætinu í deildinni, er komið með 28 stig en næstu lið Haukar og KR eru með 24 stig en eiga leik til góða.  Sigur Snæfells setur því pressuna á Hauka og KR sem bæði eiga erfiða útileiki í þessari umferð, Haukar gegn Val og KR gegn Fjölni.

Snæfell sigraði KR í kvöld 82-86 í IE-deild kvenna og á sama tíma töpuðu Haukar fyrir Fjölni 67-68 sem þýðir það að Snæfell fer uppfyrir bæði þessi lið, úr fimmta sætinu í það þriðja.  Snæfell hefði þó helst þurft minnst 5 stiga sigur á KR til þess að standa betur í innbyrðis viðureignum liðanna og verða þannig fyrir ofan KR standi þau aftur jöfn í deildinni. En það er nú algjörlega í höndum Snæfells að halda sér á meðal fjögurra efstu síðustu fjórar umferðirnar.